Rikala jaman semana para wali nyebarake
agama Islam ing tlatah Jawa, sakdurunge kabeh nganut agama Hindu. Wektu
iku panguwasa isih diwengku dening raja ing Majapahit yaiku Prabu
Brawijaya V. Sakwetara wilayah kabupaten Rembang rikala semana isih akeh
daerahe sing awujud alas. Penduduk uripe nggrombol ing padesan cilik
tur sepi. Ing kahanan kang kaya mangkono teka nom-noman kang manggon ing
alas kono banjur netep mbangun omah kang jarake saka pesisir lor
antarane 10 km arah ngidul. Sakbanjure ing panggonan kang isih wujud
alas kuwi, nom-noman lanang mau ngajak wong-wong kang ditemoni supaya
melu nyinaoni lan nglakoni syariat Islam. Tambah dina tambah akeh
wong-wong sing melu pangajake pengembara mau kang ora liya sawijining
Syayid.
Padesan kang maune sepi sansaya suwe
sansaya reja amarga akeh ditekani wong-wong manca saperlu meguru marang
syayid. Sakwise ditekani wong-wong saka mancakang meguru marang Syayid,
Syayid kuwi banjur netep manggon ing kono. Alas kang maune gung liwang
Liwung ewah dadi desa kang gedhe, akeh penduduke. Cekak aosing crita,
Syayid sing maune pengembara malih dadi panguwasa ing panggonan kang
anyar. Banjur ora suwe dadi padesan kang rame. Sing diwenehi sebutan
Syayidan. Kang ateges papan kang dipanggoni dening sawijining Syayid.
Tindak tanduk lan subasitane Syayid patut
kanggo tuladha kang becik kanggo warga sakiwa tengene. Sawijining dina
Syayid nandang lara banjur tilar donya. Kabeh pengikute lan penduduk
sakiwa tengene ngelingi lelabuhane Syayid sing apik, senadyan wis tilar
donya tetep dadi pepeling. Layone dikubur cedak karo omahe banjur
kuburane ditanduri wit jati lan dikeramatke ora tau ditebang. Wektu
lumaku terus, ora krasa puluhan taun kuburane Syayid angker. Papane
manggon kapernah 300 meter arah ngalor saka pasar Sedan. Sebutan Sedan
iku sal mulane saka tembung Syayidan kang tegese Syayid. Kanggo ngeling
jasa-jasane Syayid nganti seprene desa Sedan isih ana.
Tidak ada komentar:
Posting Komentar